मधुयाम जिन्दगीमा आजै आए जस्तो

मधुयाम जिन्दगीमा आजै आए जस्तो
कोइलीले तिम्रै हाम्रै गीत गाए जस्तो

बहारले हाम्रै निम्ति सजाएको जस्तो
लज्जावती हामीसँगै लजाएको जस्तो

नदीहरु हाम्रै सूरमा सुसाएको जस्तो
झरनाले हाम्रो प्रीत रुचाएको जस्तो

तिम्रो साथ हुँदा सब थोक पाए जस्तो
सपनीमा विपनीमा माया लाए जस्तो

धर्तीबाट धेरै पर स्वर्ग आए जस्तो
मधुयाम जिन्दगीमा आजै आए जस्तो ॥

आयोदधौम्य (निर्मलमणि अधिकारी)

अघि बढौँ यो युग हाम्रो हो

हुँदैन यो दुरवस्था/दुर्दशामा रल्लिन;
अघि बढौँ -
पुनर्जागरणको मार्गमा;
पुन: श्रेष्ठ बन्नेछौँ ।
वैदिक मन्त्रद्रष्टा ऋषिका सन्तान हामी;
तीर्थंकर र बुद्धका आशिर्वाद पनि हामीसँगै छ;
अनेकौँ आचार्य, गुरु, सन्तका मार्गदर्शनको परम्परा छ हामीसँग;
अघि बढौँ यो युग हाम्रो हो ।